Manipur : Acre 100 chuanga zaua poppy chin tichhia

Security force-ten ruihhlo do hna an kalpuina peng pakhatah dan loa poppy chinna hmun dap chhuah hna an thawh mekah, tunkar chhungin Manipur-a Kangpokpi leh Ukhrul district-ah ram acre 100 chuanga zaua poppy chin chu tihchhiat a ni.

Manipur-a poppy chinna ram dap hna thawhah hian state police, Central Reserve Police Force (CRPF), Assam Rifles leh forest department official bakah district thuneitute an thawk ho a ni.

Poppy chinte an hal bakah thlam 22, leiṭha bag 10 bakah chi bag kua tichhiain an hal tel bawk. Official-te chuan FIR ziah luh a ni bawk tih sawiin, dan loa poppy chin leh sawngbawl hnaa inhnamhnawih leh sum thawhtute man chhuah ngei an tum tih an sawi.

Security force-te hian Thawhlehni khan Ukhrul district-a Litan police station huam chhunga mi, Mullam tlang dunga ram acre 35-a poppy chin an tichhia a, hemi ni vek hian Mullam leh Shongphel khua poppy chinna hmun tihchhiat a ni bawk. November 12-ah Kangpokpi district-a Thonglang Akutpa–Songjang tlangdung leh Awlmun khaw inkara ram acre 56 vela zaua poppy chin hmuh chhuah leh niin, tihchhiat a ni leh bawk a ni.