Nagaland : Anti-narcotics conference buatsaih

Nagaland-a Chumoukedima-ah Narcotics Control Bureau leh Nagaland police buatsaih ni hnih awh tur, anti-narcotics conference chu nimin khan Chumoukedima-ah ṭan a ni.

Nagaland director general of police (DGP), Rupin Sharma chuan ruihhlo tawlhruk chu vantlang nghawng pawi thei a nih thu leh, ram leh hnam hmelma a nih thu a sawi. DGP chuan helai biala dan kengkawhtute chu inpumkhat tur leh, technology hmanga hma la turin a ngen. Hmarchhak bial chu Golden Triangle hnaih taka awm a nih vang leh, Myanmar nen ramri inhnaih taka awm a nih vangin ruihhlo do beihpui thlak kawngah hmalak nasat a ṭul thu a sawi bawk. India-Myanmar ramri daidanna siam loh leh zalen taka inkalpawh theihna, Free Movement Regime (FMR) hnuaia awm a nih avangin ruihhlo tawlhru ṭhinte an huangtau hle tih a sawi.

Ruihhlo tawlhruk leh a hmang sualtu an pun zel avangin, dan leh thupek mai ni lo, venhimna leh ṭhalai hmalam hunah nghawng pawi tak a nei tih DGP chuan a tarlang. Nagaland-ah ruihhlo hmang sual mi nuai 1.2 vel an awm niin a sawi a, heroin 'Shaanflower' tiha tualchhung mipuiten an hriat chu hmansual tam ber a nih thu a sawi bawk.

DGP chuan ruihhlo zawrh hluar zel chuan pawikhawihna, helna, leh narco-terrorism a thlen tih a sawi. Helpawl mi eng emaw zat chu ruihhlo tawlhruknaah an inhnamhnawih tih a tarlang a, ruihhloa sumdawngte tihchhiat chu venhimna tihchakna atan thil pawimawh tak a ni, a ti.