Arunachal Pradesh : Sorkar official pali suspend

Arunachal Pradesh sorkar chuan nimin, Nilaini khan sorkar official pali chu East Kameng district-a kawngpui siamna tur ram chungchanga zangnadawmna pek danah thil dik tawk lo tiah puhin a suspend a, East Kameng Deputy Commissioner pawh suspend tura rawtna siam a ni bawk.

Official an suspend zingah deputy commissioner (DC) Himangsu Nigam (IAS), divisional forest officer (DFO) Abhinav Kumar (IFS) te an tel a, Head of Department pathumte pawh he inbumnaah hian an inhnamhnawih nia sawi a ni.

Department of Land Management -in thuchhuah a siamah, RFCTLARR Act, 2013 hnuaia Ground Verification Board din chuan Lada-Sarli Frontier Highway, km 125.55-a thui siamna tura ram lak tura zangnadawmna pek tur chungchang chu an ngaihtuah a ni. Board member-ah hian Forest, Agriculture, leh Land Revenue department-a official-te an tel. Sorkar chuan Board rawtna chu pawmin, compensation sum chu April 17, 2025 khan East Kameng District Deputy Commissioner hnenah hlan a ni, a ti.

Ram neitute hnena zangnadawmna pek tur chungchangah hian complaint tam tak a lut a, district thuneituten ram leh an thil neihte endikna tur ground survey mumal tak an neih loh thu sawiin Forest, Horticulture, Agriculture, leh PWD department-a official-te nen multidisciplinary committee an din loh thu an sawi. Hemi hnu hian sorkar chuan thil awmdan chhui chiang turin, August 13 khan Commissioner (Transport) kaihhruaina hnuaiah Fact-Finding Committee a din a, FFC hian November 4 khan report theh lutin, zangnadawmna pek tur siamah hian thil fel tawk lo a awm ngei a, ram neitu dik takte ngaihthah an ni a, hetih lai hian ram nei lo pawh zangnadawnna dawng turah hian telh a ni tih an hmu chhuak. Field survey titu district team chu a mawphurtuah an puh a ni.