Manipur : BJP hruaitu BL Santosh leh Sambit Patra-ten Imphal thleng

BJP hruaitu hlun, BL Santosh leh party national general secretary (Organisation), leh national spokesperson Sambit Patra-te chu nimin, Nilaini zing dar 11:30 vel khan Manipur khawpui, Imphal an thleng. Hruaitu pahnihte hi Bir Tikendrajit International Airport-ah BJP Manipur president, A. Sharda Devi leh party worker eng emaw zatin an lo hmuak.

BJP hruaituten Manipur an tlawh hian ngaihven a hlawh hle a, chief minister hlui N Biren Singh pawhin intlawh satliah a ni dawn lo tih a lo sawi tawh bawk. CM hlui Singh leh BJP MLA-te chuan Bihar inthlan zawhah Manipur-ah sorkar thar siam a ni dawn tih an lo sawi tawh a ni. Santosh leh Patra-te hian ni hnih chamin Churachandpur an tlawh bawk dawn.

BJP MLA 25 velin New Delhi an tlawh ṭum khan BL Santosh leh Patra-te hi an lo hmu tawh a, state-ah sorkar mumal a awm thuai theihna tura hma lak sak turin an ngen a ni. Bihar inthlan zawh fel a nih tak avangin Manipur chungchang hi an ngaihtuah tawh dawn nia ngaih a ni.