Meghalaya : Sorkarin high-level consultation meeting nei

Meghalaya sorkar chuan Thawhlehni khan hmeichhia leh naupang venhimna tihchakna atan high-level consultative meeting a nei. Kum 2024 chhung khan Meghalaya-ah hian hmeichhiate chunga pawikhawihna thubuai 658 record a ni a, naupang chunga pawikhawihna thubuai 556 theh luh a ni bawk.

Meeting hi State Convention Centre Auditorium, Shillong-ah neih a ni. Meghalaya sorkar (Social Welfare Department) adviser, Paul Lyngdoh chuan kaihruaiin, stakeholder pawimawh tak tak an tel. Meghalaya State Commission for Protection of Child Rights (SCPCR) leh Meghalaya State Commission for Women (MSCW) chairperson-te pawh an tel bawk a ni.

Adviser Paul Lyngdoh chuan sorkarin hmeichhia leh naupang venhim a ngaih pawimawh thu a sawi a, tun hnaia Sohra-a dawi (witchcraft) hmanga pawikhawihna thleng chungchang pawh sawilangin, Lyngdoh chuan sorkarin rang taka hma a lak thu a sawi. Hei bakah Anti-Narcotics Task Force (ANTF) ten ruihhlo do kawngah nasa taka hma an lak chhunzawm zel avangin lawmthu a sawi bawk.

SCPCR chairperson, Agatha Sangma chuan high-level consultation meeting chu hmeichhia leh naupang laka pawikhawihna a pun zel avangin chief minister Conrad K Sangma-a'n a buatsaih tih a sawi. Hemi kawnga hma lak a ṭulnate tarlangin, POCSO Act chungchang inzirtirna zau zawka kalpui, sikul-a counsellor dah, Child Safety Committee din, leh naupangte mobile phone khawih hun tihtlem a pawimawh thu a sawi. Hei bakah nute tan an remchan dan anga hnathawh hun thlak danglam theih a phut bawk a ni.

MSCW chairperson Iamon Syiem chuan nu, pasal nei loa fate enkawl, mahni inchhung leh hnathawhna hmuna tihduhdahna tawk an pun zel avangin a lungawi loh thu a sawi. Hmeichhiate chunga pawikhawihna thleng ṭhin chungchangah uluk zawka data lakkhawm a ṭul thu sawiin, hmeichhiate zah tura ṭhalaite fuih thar a rawt bawk.