Tripura-ah nausen leh nau chunga thi zat an tlahniam

Tripura chief minister Manik Saha chuan an state-ah heathcare system lama hmasawnna nasa tak hmuh a nih thu sawiin, tun hnaiah nausen thi leh nu, nau chunga thi zat pawh an tlahniam hle tih a sawi.

Agartala Government Medical College and GBP Hospital-a Association of Surgeons of India-a Tripura chapter-in 19th annual conference a hmannaah thu sawiin, Chief Minister chuan tun hma lama Tripura-a tih theih loh, medical procedure harsa tak tak eng emaw zat hlawhtling taka tih theih a ni ta tih a sawi. "Kidney transplant pawh a tih theih tawh a, liver transplant tih theihna tur pawhin hma lak mek a ni," a ti.

CM chuan khawpui leh thingtlang lamah healthcare pawh thuam chak zel niin, district leh sub-divisional hospital-ah trauma centre siam tharin, facility-te pawh tihchangtlun mek a nih thu a sawi. Healthcare system lama an hmasawna lantirna chu nausen thi leh nu, nau chunga thi tlahniam zel chuan a tilang niin a tarlang bawk.