Assam school syllabus-ah Zubeen Garg chanchin telh dawn

Assam State School Education Board (ASSEB) hnuaia Class IX-XI syllabus-ah Assamese zaithiam lar, Zubeen Garg chanchin telh a ni dawn tih official-te chuan an sawi.

ASSEB official-te chuan zirlai bua Zubeen Garg chanchin dah tel a nihna chhan chu zirlaiten Assam culture tana a thawh hlawk dante an hriat theihna tur a ni tih an sawi a, academic session thar aṭanga hman ṭan tura buatsaih mek a ni. Class IX leh X chuan Zubeen Garg bakah Bhupen Hazarika chanchin an zir dawn a, Class XI chuan media and information literacy course-ah Zubeen chanchin hi an zir dawn a ni.

University of Science and Technology, Meghalaya (USTM) chuan Zubeen Garg-a chanchin, philosophy leh art and culture tana a thaw hlawk dante zirna, research fellowship a hawng bawk. University hian nikum khan honorary DLitt an lo hlan tawh bawk a ni.

Zubeen Garg hi kumin September 19 khan Singapore-ah a thi a, a thih dan hian ngaihven a hlawhin, chhui zui mek a ni bawk. Kum 30 chhung rimawi khawvela inhmangin, ṭawng chi 40 in hla 38,000 chuang a record hman a, film eng emaw zat a direct bawk. Assam cinema hmasawnna tur pawhin a thawh hlawk hle.