Hmarchhak Kristian pawlin Manipur buaina zirchiang tur task force din

Hmarchhak bial Kristian pawl lian, United Christian Forum of North East India (UCFNEI) chuan Manipur tualchhung buaina zirchiang tur leh, buaina chinfel dan kawng ngaihtuahtu tur task force a din.

Kar liamta Zirtawpnia Presbyterian Church of India (PCI) Headquarters, Shillong-a annual meeting an neihah UCFNEI hian thutlukna hi an siam a ni. Sorkar laipui chu hmarchhak biala buaina leh Kristian ten harsatna an tawhte chinfel dan ngaihtuah turin an ngen bawk.

UCFNEI thupuangtu, Allen Brooks chuan task force an din thar hian stakeholder-te kawmin, buainain nghawng a neih dan hrang hrangte an zirchiang dawn a, hma lak dan tura rawtna an neihte nakkumah an theh lut dawn tih a sawi.

Meeting-ah hian Assam, Arunachal Pradesh leh Meghalaya ramria buaina thleng ṭhin chungchangte pawh sawi ho a ni bawk. Assam Healing (Prevention of Evil) Practices Act 2024, bakah Forest (Conservation) Amendment Act 2023 in leilung fatea nghawng dan hrang hrangte an sawi ho bawk. He meeting-ah hian North East India Christian Council, North East India Regional (Catholic) Bishops’ Council leh Evangelical Fellowship of India aiawhte bakah, Arunachal Pradesh, Assam, Manipur, Meghalaya, Mizoram, Nagaland, leh Tripura-a UCFNEI chapter aiawhte an tel.