Manipur : Union Minister-in video cenference hmangin IDP-te dinhmun enfiah

Union minister of state for home affairs, Bandi Sanjay Kumar chuan Nilaini khan Churachandpur district inrelbawl dan, a bik takin Internally Displaced Persons (IDP) te dinhmun enfiahin Hotel Classis Grande, Imphal-a video conference neihah a tel. Manipur-ah hian IDP 15,000 an awm mek a, relief camp 75 a awm bawk.

Minister chuan district dinhmun leh an hmasawnnate a endik a, relief camp-a IDP-te chu ngaih pawimawh an nih thute a sawi a, sorkar laipui leh state sponsor scheme kalpui dan a endik bawk. Hei bakah sector hrang hrang; hriselna, zirna, power, agriculture, transport, puan tah leh handicraft dinhmun ennawnna a nei bawk a ni.

Churachandpur deputy commissioner, Dharun Kumar S chuan Minister chu project leh programme hrang hrang kalpui mekte chipchiar takin a hrilhfiah. Thuneitute chuan IDP-te chu an nitin mamawh pek kawngah theihtawp an chhuah thu tarlangin, an khawsak tihmasawnna turin thlawpna an pe reng tih a sawi.

Deputy Commissioner chuan PM SHRI School, state government institution, central institution - Navodaya Vidyalaya leh Kendriya Vidyalaya bakah, mimal enkawl sikul eng emaw zatah zirnain hma a sawn zel tih a tarlang a, thuneitute hmalakna avangin sikul chawlhsan an tlakhniam thu a sawi bawk. Hetih lai hian higher education-ah zirlaiten harsatna an la tawk fo a, hei vang hian hemi kawnga hma la turin PR scheme kalpui a ni.

Dharun Kumar chuan Churachandpur district-in medical college neiin healthcare lama thawk ṭha ber pawl an ni tih a sawi a, super specialty leh tertiary care-ah erawh harsatna an tawk tih a tarlang.