Rs vbc nuai 1.78 hu project December-ah tlangzarh dawn : Assam CM

Assam chief minister Himanta Biswa Sarma chuan, kumin kumtira investment summit neiha Rs vbc nuai 1.78 vel man hu project an lo tiam tawh chu

December thla chhungin tlangzarh a ni dawn tih a sawi. He investment leh project hmang hian ṭhalaite chuan state-ah hna thawh tur tam zawk an nei dawn tih a sawi bawk.

Zirtawpnia Guwahati-a programme a neihah, Chief Minister chuan project lian tham pathum- Global Health Limited hnuaia Medanta Super Specialty Hospital, RJ Corp Healthcare siam tur Cocoon Mother and Childcare Hospital leh Lemon Tree five-star hotel lungphum a phum a ni.

Sorkarin state pumah hmasawnna project hlawhting tak tak a kalpui tih sawiin, Sarma chuan Advantage Assam 2.0-a investment-te chu a hlawhtling hle tih a sawi. Rs vbc 40,000 senna tur thermal power project pawh thawh ṭan thuai a nih tur thu a sawi bawk. Kumin December thla chhungin project eng emaw zat zingah palm storage venture thawhna atan Rs vbc 30,000 sen a ni dawn tih sawiin, project an thawh tur zawng zawngah Rs vbc nuai 1.78 sen a ni dawn a ni, a ti.

CM Sarma chuan lungphum a phumte chu Assam industry hmasawnna kawnga pawimawh tak a nih thu sawiin, state healthcare leh hospitality infrastructure tihchakna kawngah nghawng thui tak a nei dawn a ni, a ti. Kumin February thlaa Advantage Assam 2.0 neiha MoU an ziah hnuaiah, Rs vbc 800 vel investment hmanga din a nih thu a sawi bawk.

Medanta Super-Speciality Hospital hi ram acre 3.5-a zauah sak a ni dawn a, Cocoon Mother leh Childcare Hospital chu ram acre khata zauah leh, Lemon Tree Hotel chu ram acre 1.75 a zauah sak a ni dawn a ni.