Meghalaya : CM-in Block Integrated Development Complex hawng

Meghalaya chief minister Conrad K Sangma chuan Thawhlehni khan Pynursla C&RD Block, East Khasi Hills district-a Block Integrated Development Complex (BIDC) sak thar a hawng. Hawnna inkhawmah hian deputy chief minister Prestone Tynsong pawh a tel.

CM Sangma chuan Pynursla C&RD Block-a officer leh staff-te bakah, khawtlang mipuite inpekna leh thawh hona ṭhat avangin project pawh hlawhtling taka kalpui a nih thu a sawi. A sorkarin hmasawnna lama a hmathlirte sawilangin, administrative infrastructure tihchangtlung chu ngaih pawimawh a ni, a ti. Sorkar scheme-te chu tihdanglam ni lo mah se, mipuiin hamṭhatna an dawn theihna turin hma lak chhunzawm zel a nih thu a tarlang bawk.

Chief Minister chuan block office ṭhenkhata department pali emaw panga emawte chuan room pahnih an inṭawm ṭhin tih sawiin, tunah chuan block tinin office mumal an nei tawh dawn a ni, a ti. Meghalaya-a block office 56-te chuan office complex an neih theihna turin sum pawh sanction a nih tawh thu a sawi bawk. Office ṭhenkhat pawh hawn a ni tawh a, a ṭhen chu sak tura tender buaipui mek a nih thu sawiin, kum khat emaw kum hnih emaw hnuah block tinin office thar an nei tawh dawn a ni, a ti.

State hmun hrang hranga administrative building infrastructure investment-ah Rs vbc 150 sen a ni tawh tih Sangma chuan a sawi. Police Infrastructure Renovation Fund (PIRF) hnuaiah, superintendent of police-te chu police station thuam ṭhatna tur sum pek an ni tih a sawi a, sikul thawm ṭhat leh sakna atan Rs vbc 500 sen a ni tawh bawk.