Assam: Bodoland Territorial Council (BTC) budget enfiah

Assam-a Bodoland Territorial Council (BTC) sum hman dan leh, inrelbawlna an kalpui dan enfiah turin Thawhlehni khan Lok Sewa Bhawan, Guwahati-ah meeting neih a ni. Meeting-ah hian chief minister Himanta Biswa Sarma leh BTC chief executive Hagrama Mohilary bakah, council executive member-te leh officer pawimawhte an tel.

Meeting-ah hian BTC interim budget siam a nih bakah, inrelbawlna leh hmasawnna kaihhnawih thil pawimawh eng emaw zat sawi ho a ni. Council sum dinhmun leh budget kalpui dan tur pawh zirchian a ni bawk.

Bodoland People's Front (BPF) hruaitu, Durga Das Boro-a'n thuthar lakhawmtute a kawmnaah, BTC tana sum ruahman leh hman theih tura kalpui dan sawi ho a nih thu sawiin, budget-a sum awm dan leh pek chhuah dan tur chungchang ngaihtuah ho a ni, a ti. Boro chuan tun hnaia BTC inthlan neih laia thutiam siamte pawh zirchian a nih thu a sawi.

Assam sorkar leh BTC inkara chhiah insem chungchang pawh an thurel pawimawh zingah telin, BTC hruaitute chuan council huam chhunga hmasawnna chak zawka kalpui a nih theihna atan chhiah insem dan felfai taka ruahmanna siam a ṭul thu an sawi. BTC sorkar hmasain bill a thehluhte pawh zirchian a ni.

Sorkarna chelh mek BTC chuan November 25-ah state sorkar hnenah budget pek belh a remti. Boro chuan sum hman dan tur a zirin an sum sen tur chu Rs vbc 1,500 emaw, Rs vbc 3,000 emaw nih thu a sawi a, Dispur leh Kokrajhar-ah formal channel hmanga chinfel a nih tur thu a sawi bawk.