Tripura: Sepahijala district-a buaina chhuakah BJP activist-te inhliam

Tripura-a Sepahijala district-a Takarjala-a hun hmang tura kal, BJP activist eng emaw zat chu Nilaini khan Tripura Tribal Areas Autonomous District Council (TTAADC) headquarters, Khumulwng bula buaina chhuakah an hliam. An lirtheite pawh tihchhiatsak an ni tih party chuan an sawi.

He buaina hi Agartala-a TIPRA Motha legislator Ranjit Debbarma kaihhruaia Tripura Civil Society-in Tiprasa Accord hman an phut leh, dan loa state-a pem lut hriatchhuah an phut avanga darkar 24 chhung state puma nawrh an huaihawt hmaa thleng a ni.

Tripura BJP thupuangtu, Nabendu Bhattacharya chuan BJP activist phurtu lirthei paruk vel chu tihchhiat a nih thu leh, tualchhung police hnenah complaint theh luh a ni tih a sawi. Bhattacharya chuan BJP activist-te tharum hmanga beitute chu hriatthiam an ni dawn lo tih sawiin, vantlang pawhin tharum thawhna hi a do zel dawn tih a tarlang.

Tripura chief minister Manik Saha chuan, mitinin politics khel turin dikna chanvo an nei tih a sawi a, mahse heng diknate hi tharum thawhna atan hman tur a ni lo, a ti. BJP chu sorkar laipui a ni emaw, state a ni emaw, mipui tana thawk an nih thu a sawi bawk.