Assam : Governor-in TB natna vei mi 100 ṭanpuina pe

Assam-in Tuberculosis (TB) natna do kawnga hma a lakna kalzelah, Assam governor Lakshman Prasad Acharya chuan October 22, Nilaini khan Kamrup Metro leh Nagaon district-a TB natna vei mi 100 hnenah Ni-kshay Mitra hmalaknaa National Tuberculosis Elimination Programme (NTEP) hnuaiah ṭanpuina a pe.

Raj Bhavan, Guwahati-ah hun hmanah Governor chuan chaw hrisel awmna basket chu TB natna vei pangate hnenah a hlan a, Ni-kshay Mitras panga hnenah chawimawina a hlan bakah, TB Champion pangate hnenah state-in TB natna a dona kawnga an thawhhlawkna avangin chawimawina a hlan bawk.

Governor Acharya chuan TB chu ram chhunga hriselna kawnga harsatna thlentu lian ber a ni tih sawiin, he natna hi thawh hona, inkhawngaih tawnna leh tha thlah loa a do kawnga hma lak a nih chuan a reh thei tih a sawi. TB natna vei mi 100 chhawmdawlna pek an ni chu mimal intiamkamna leh vantlang tana mawhphurna hlen chhuahna a nih tih sawiin, TB chu damdawi lama enkawlna mai bakah, vantlang thlawpna nena enkawl ngai an ni tih a sawi.

Prime minister Narendra Modi-a'n rampum huap TB dona Jan Andolan, mipui hmalaknaa a thlak chu Governor chuan lawmawm a tih thu sawiin, he hmalaknaah hian mimal leh pawl hrang hrang an tel tawh a ni. Assam-in TB do kawnga hmasawnna a neih dante tarlangin, Acharya chuan state chhunga TB testing rate chu nasa takin a pung a, kum 2022-a test nei zat mi nuai khata 842 aṭangin nuai khatah 2,915 a pung tawh a, natna hmuhchhuah hma leh a rang lama enkawl pek a tih awlsam phah a ni, a ti. TB natna vei 90% chu hlawhtling taka enkawl dam an ni tawh a, Assam chu TB enkawl leh ven kawnga hmahruaitu zingah an tel tawh a ni.