Tripura-in tourism project atan Rs vbc 500 chuang rawt

Tripura sorkar chuan tourism tihhmasawnna atan project lian tham pasarih thawhna tur, Rs vbc 500 chuang rawtna a siam thu union tourism minister Gajendra Singh Shekhawat nen October 15-a Rajasthan-a meeting an neihah an puang.

National Tourism Ministers' Conference-a thu a sawiah, Tripura tourism minister Sushanta Chowdhury chuan sorkar hmasain tourism hmasawnna tur a ngaihthah tih a sawilang tel bawk. "Tripura hi hmarchhak kila awm a ni a, a sir hmun thum aṭangin Bangladesh-in a hual a ni. Sorkar hmasain tourism tihhmasawnna atan hmalakna lian tham a nei lo a, tourism sector tihhmasawn tura hmalakna chu kum 2018-a kan sorkarin thuneihna a chan hnuah chauh neih ṭan a ni", a ti.

Chowdhury chuan prime minister Narendra Modi leh chief minister Manik Saha-te chu state tourism ṭhanlenna tura an thlawpnaah lawmthu a hrilh bawk. Tun hnaia Ministry of Tourism-in report a ti chhuahah, Tripura chu rampawn aṭanga state tlawhtu tam lamah pahnihna a ni tih tarlan a ni a, union minister kaihhruaina leh thlawpna avangin tourism-in hma a sawn zel tih a sawi .

Tourism secretary U.K. Chakma chuan khualzin tlawh tamna hmun tarlangin; Ujjayanta Palace, Neermahal, Unakoti, Tripura Sundari Temple, Sepahijala Wildlife Sanctuary, Chabimura, Dumboor Lake, leh Jampui Hills-te an nih thu a tarlang. Hei bakah Tripura chuan hmarchhak bialah airport lian ber pahnihna an nei bawk a; Delhi, Kolkata leh khawpui lian dangte nen a inthlunzawm a ni.