Tripura : BSF leh NCB-in ruihhlo Rs vbc 16 hu man

Tripura-a Sepahijala district-ah Border Security Force (BSF) leh Narcotics Control Bureau (NCB) ṭangkawp chuan Yaba tablet, Rs vbc 16 hu an man tih official-ten Thawhṭanni khan an sawi.

Tripura Frontier BSF leh Agartala-a NCB official-te chuan an thudawn bawhzuiin, Madhya Boxanagar-a Kalamchoura police station hnuaia cheng, ruihhlo tawlhru ṭhin nia rinhlelh chu Pathianni zan dar 11:30 aṭanga Thawhṭanni zing dar 2 chhung khan an dap a ni. Beihpui an thlaknaah hian Yaba tablet, bawm 16-a intuam an hmu chhuak a, a neitu Lipiyara Khatun (33) pawh man nghal a ni.

Yaba tablet an man hi kg 16 a ni a, mum nuai 1.6 vel niin, market-ah Rs vbc 16 man hu a ni tih BSF thuchhuah chuan a tarlang. Thuneitute chuan Khatun hi thu zawhfiah turin an man nghal a, BSF-te chuan ruihhlo an man hi chhuizui turin NCB Agartala kutah an hlan bawk.

Official-te chuan hlawhtling taka ruihhlo man a ni chu BSF-ten ruihhlo do kawnga an inpekna rah a ni tih an sawi a, agency dangte nen thawh hona ṭha tak an neih ṭhin chuan ruihhlo man kawngah a pui nasa tih an tarlang.