Sikkim : Governor-in Sevoke-Rangpo rel project hnathawh enfiah

Sikkim governor Om Prakash Mathur chuan Khanikhola, Rangpo hnuaia Pakyong district-a Sevoke-Rangpo Railway Line Project thawh mek chu tlawhin, an hna thawhna kawnga hmasawnna leh state leh ram tana pawimawhna a neih theih dan turte a enfiah. Sevoke-Rangpo railway line-ah hian tunnel 14 leh bridge 23 a awm dawn a, a tam zawk chu siam zawh tawh a ni.

Governor hi Lok Sabha MP Dr. Indra Hang Subba, Pakyong district collector Rohan A leh district administration official-ten an ṭawiawm a, Northeast Frontier Railway (NFR) senior official-te nen inbiakna an nei nghal bawk.

Review meeting an neihah, NFR general manager Arun Chaudhary leh IRCON International Limited CMD Hari Mohan Gupta-te chuan an hnathawh hmasawn dan kimchang leh, a hun taka zo fel tura harsatna an tawh ṭhenkhatte an lo hrilh a ni.

Governor Mathur chuan Sevoke-Rangpo railway project chuan Sikkim tourism sector a tichak dawn tih sawiin, national security a tichangtlung dawn a, helai biala industry leh socio-economy ṭhanlenna kawngah a pui dawn a ni, a ti. Official-te chu a sakna lamah standard sang tak vawng nung tur leh, a hun taka zo fel thei turin a chah bawk.

Hmarchhak biala intlawhpawhna ṭha awm theihna tura prime minister Narendra Modi hmathlir pawh sawilangin, Governor chuan he project hian hmarchhak bial hmasawnna tura sorkar laipui inpekna a pholang tih a tarlang. NFR leh IRCON official-te pawh project-a an inpeknaah fakin, a hun taka zawh a nih theihna tura hma an lak avangin lawmthu a sawi bawk a ni.