Assam : Global employment scheme hnuaiah ṭhalai 50,000 Japan-ah thawn dawn

Assam chief minister Himanta Biswa Sarma chuan Pathianni khan state flagship CM-FLIGHT (Chief Minister’s Foreign Language Initiative for Global Human Talent) hnuaiah Assam ṭhalai 50,000 te chu Japan-ah hna thawk turin thawn an ni dawn tih a puang.

North East Skill Centre, Guwahati-a hun hmannaah he thu hi CM chuan puangin, an program siam hian inthlakdanglamna lian tak a thlen dawn a ni, a ti. Tualchhung ṭhalaite tan khawvel hmun zau zawkah hnathawhna kawng a hawng dawn a, ram dang aṭanga sum thawh chhuah hmangin Assam economy tihchak a ni dawn tih a sawi.

Kerala leh Maharashtra state pawhin ram dang aṭanga sum an thawhchhuah hmangin economy lamah hmasawnna an nei tawh a, Assam pawhin hemi kawng hi zawh ve a pawimawh thu Sarma chuan sawiin, ṭhalaite chu ram pawna hna an thawh a, state chhunga pawisa an thawn luh chuan state sum leh pai dinhmun a tichak dawn a ni, a ti.

CM-FLIGHT program hi Assam Skill Development Mission (ASDM) leh Skill, Employment and Entrepreneurship Department (SEED) hnuaia kalpui a ni a, ṭhalaite ram dang ṭawng, a bik takin Japan ṭawng zirtir a, ram pawna hna ṭha tak an thawh theihna tura chherchhuah chu a tum bulpui ber a ni.

Sarma chuan Specified Skilled Worker (SSW) visa program hnuaia workforce exchange tihhmasawnna atan, India leh Japan chuan Memorandum of Understanding (MoU) an ziak tawh tih a tarlang. He visa category-ah hian Japan-a skill sector 160 chuangah hna thawh a phalsak a ni.