Meghalaya : Kum 2023-ah naupang rukbo tam

National Crime Records Bureau (NCRB) report tarlan danin, Meghalaya-ah kum 2023 chhungin naupang 84 rukbo an ni a, mipa 22 leh hmeichhia 62 an ni. A kum hmasaa rukbo, zawn hmuh loh mipa pahnih leh hmeichhia pariat an la awm bawk a, chin hriat loha awm hi an vaiin 94 an tling .

Kum 2023 chhunga Meghalaya-a naupang laka pawikhawhna thleng thubuai ziah luh 512 zingah 36.13% chu rukbo thubuai a ni.

Thla hmasa khan hmeichhe naupang kum li mi chu an chenna, Nongrah aṭangin a bo a, ni rei vak lo hnuah a ruang chhar a ni. Upper Rajasimla, North Garo Hills aṭangin hmeichhe naupang kum ruk mi chu a chhungte MGNREGA project an thawh laiin rukbo a ni bawk. July 2024 khan mipa naupang pahnih, kum 11 mi ve ve chu Noingstoin aṭanga rukbo an ni a, October 2023 khan Jongchipara, West Garo Hills aṭangin mipa naupang kum 7 mi pawh rukbo a ni bawk.

NCRB data-a lan danin, India ram pumah kum 2023-a naupang laka pawikhawihna thleng, crime rate hi nuai khatah 39.9 a ni. Meghalaya-ah chuan 37.1 a ni a, hmarchhak state zingah Assam leh Sikkim tih lohah chuan a sang ber. Hmarchhak state zingah naupang laka pawikhawihna thleng hi Assam-ah tam berin, nuai khatah 84.2 niin Sikkim-ah 67.5 an tling a ni.