Assam CM-in Sikkim leh Bengal leimin leh tuilian tuarte ṭanpui

Assam chief minister Himanta Biswa Sarma chuan Darjeeling, West Bengal-a leimin leh, Sikkim-a tuilian vanga harsatna tawk leh nunna chan an pung zel chu ngaihven a ṭul tih sawiin, state pahnihte chu ṭanpui an mamawhna apiangah an pui dawn tih a sawi.

Darjeeling district-ah hian leimin vangin mi 24 an thi tih finfiah a ni tawh. Leimin hian chenna in tam tak a hnawl tawh a, ruah a la sur chhunzawm reng bawk. Disaster management lam chuan nimin Thawhṭanni khan chhanchhuah hna an thawh chhunzawm zel a, mi eng emaw zat chin hriat loha an la awm bakah, khualzin sang chuang an tangkhang mek bawk.

CM Sarma chuan a social media X-ah thuchhuah siamin, Darjeeling leh North Bengal-a leimin leh tuilian avanga harsatna tawk mek chhungkuate chu chhawmdawl an ni dawn tih a tarlang. Assam mipui aiawhin, West Bengal sorkar chu chhanchhuah leh chhawmdawl hna thawhna kawngah ṭanpuina pek an inpeih reng thu a sawi bawk.

Chief Minister chuan an ṭhenawm state Sikkim-a chhiatna thleng chu ngaihven thuai a ṭul tih tarlang bawkin, hun harsa an tawh laiin Assam chu Sikkim tan a awm reng a ni, a ti. Sikkim-ah hian ruah a sur chhunzawm reng avangin infrastructure a tihchhiat bakah inbiakpawhna a tibuai a, chhawmdawl hna thawhnaah harsatna a thlen tih official-te chuan an sawi.