Nagaland : Deputy CM-in ni 90 chhung awh campaign hawng

Nagaland deputy chief minister Y patton chuan nimin October 6 khan ni 90 chhung awh tur, 'Atmanirbhar Bharat Sankalp Abhiyan' campaign a hawng. He campaign hi mipui hnena tualchhung thil siam chhuah lei tura fuihna leh tualchhung industry-te thlawp tura inzirtir leh infuihna tur a ni.

Kohima-a BJP headquarters-a thu a sawiah, Patton chuan campaign hi India-in zalenna a sual laia mahnia intodelhna tipungtu, Swadeshi movement nen a inzawm tih sawiin, tunah chuan Swadeshi hian kalphung changkang zawk; technology, defence production, semiconductor, India ṭawng, leh traditional craft- te a huam tawh a ni, a ti.

Patton chuan campaign hnuaia hmalakna hrang hrang tarlangin, chung zingah chuan online quiz, essay competition, zirlai leh professional-te tana seminar, state puma Swadeshi fair-te a tel a ni. Swadeshi kalphung chu nitin nunpui turin mipui a chah a, he hmalakna hi economy-a mahni intodelhna a nih bakah, hnam ziarang pholangtu a nih thu a sawi.

Campaign hi ram pum huap hmalakna hrang hrang- Make in India, Startup India, leh Vocal for Local zulzuia buatsaih a ni. Patton chuan tualchhung industry tihchak a, ram pawn aṭanga bungrua lakluh tihtlem, a bulṭhut aṭanga economy tihhmasawn a nih thu a tarlang.