Arunachal Pradesh : CM-in HIV leh drug policy thlak danglam

Arunachal chief minister Pema Khandu chuan October 3 khan state chhunga HIV/AIDS leh ruihhlo hmangsualte enkawl dan tur thar a puang. Dan thar siamah hian hremna aiin enkawlna leh venhimna lam ngaih pawimawh a ni tawh dawn a ni.

CM hian meeting pawimawh pahnih, 3rd State Council on AIDS leh Arunachal Pradesh Psychoactive Substances Control Authority meeting vawi 2-na a kaihhruai hnuah social media-ah ruahmanna thar hi a puang a ni. Meeting-ah hian senior official, NGO leh khawtlang hruaitute pawh an tel.

Khandu chuan HIV chungchanga thu dik lo thehdarh leh, sawichhiatna awm ṭhin tihreh a ṭul thu sawiin, sorkar chuan inzirtirna, venhimna leh enkawlna tihchangtlun kawngah hma a la dawn tih a sawi. Policy thlak danglamah chuan ruihhlo hmangsualte chu misual ang ni loin, ṭanpuina mamawh angin en an ni dawn bawk. Ruihhlo hmangsualte chu man ngawt loin, ruihhlo supply chain tihchhiat leh tawlhrutute man ngaih pawimawh hmasak tura tih a ni.

Sorkar chuan rehabilitation leh counselling service tihpun a tum a, chutih rualin ruihhlo network laka hmalakna pawh tihchak a tum bawk. Official-te chuan khawtlang mipui nen thawh hona ṭha neih a pawimawh thu sawiin, ruihhlo awm lohna state siam tur chuan inlungrual taka an thawh ho a ṭul tih a tarlang.