Meghalaya : MSSDS leh Sirobilt-in MoU ziak

Meghalaya State Skill Development Society (MSSDS) chuan nimin Zirtawpni khan software solution company Sirobilt chu thawh dunna tur, memorandum of understanding (MoU) a ziahpui.

MSSDS leh Sirobilt ten inremna an siam hnuaiah hian AI-driven enterprise resource planning (ERP) software chungchangah thla ruk chhung training program kalpui a ni dawn tih official-te chuan an sawi. He hmalakna hmang hian tualchhung ṭhalaite chu digital economy-in a mamawh, thiamna tak tak nei tura thuam a tum a ni, an ti. Training hian industry hrang hranga System, Application, leh Product (SAP) kalpuina tur project-a thawhpui theih tur professional thiam tak ni turin a buatsaih theih beisei a ni, tiin society senior official chuan a sawi.

Programme an hman tur hi SAP S/4HANA tih a ni. Advanced in-memory database SAP HANA hmanga siam niin, artificial intelligence, machine learning leh real-time analytics te thlunzawm a ni a, hei hian organization-te chu sumdawnna tihchangtlung, thutlukna siam kawnga puitu leh market inthlak danglam nen inmil turin a pui dawn a ni, tiin official-te chuan an sawi. SAP S/4HANA platform hmang hian Meghalaya ṭhalaite chu state-ah chauh ni lo, ram chhung leh khawvel market-ah pawh hun remchang a siamsak dawn a ni, an ti bawk.