Arunachal Pradesh : UTA member pathum inpe

Arunachal Pradesh khawpui, Itanagar-ah dan pawna hnawl, United Tani Army (UTA) member pathumte chu Thawhlehni khan police kutah an inpe. Cadre inpete hi self-styled corporal Jonali Basumutary; finance secretary leh self-styled lieutenant Jummik Riba; leh self-styled major leh area commander of eastern Arunachal, Sengseng Thowmoung-te an ni.

Hel inpete hian an silaite pawh police headquarters-ah state home minister Mama Natung, a adviser Mutchu Mithi leh, director general of police Anand Mohan-te hriatpuinain an tung nghal bawk. Natung chuan hel inpekna hi sorkar hmalakna pakhat a nih thu sawiin, ṭhalai kawng dik lo zawh tawhten tharum thawhna leh pawikhawihna bansan a, nunphung pangngaia an let leh theihna tura fuihna a ni, a ti.

Home Minister chuan mipui ti thlabar thei pawl, dan loa dinte chu tihtawp vek a tum tih sawiin, dan bawhchhiatnaa inhnamhnawihte chu hrem lohin an awm dawn lo, tiin Home Minister chuan a sawi bawk. Ṭhalaite chu firfiak pawl thlem theiha awm lo turin a chah a, ralthuam tel loin thlamuang takin a dam khawchhuah theih a ni, a ti. Tun hnaiah UTA hel panga an inpe tawh a, pasarih dangte pawh man an ni tawh bawk

UTA hi December 2024 khan din a ni a, state chhunga mega dam siam leh tribal ni lo hnena Scheduled Tribe (ST) certificate pek an dodal tih an sawi. Arunachal Pradesh aṭanga Chakma-Hajong raltlan hnawhchhuah an phut bawk. An pawl hi Anthony Doke kaihhruai niin, ani hi pawl ṭhiah tawh National Liberation Council of Taniland hotu hlui a ni.