Assam : Power Station chima thi chhungte chhawmdawlna pe dawn

Assam chief minister Himanta Biswa Sarma chuan Thawhlehnia Tamil Nadu khawpui Chennai-a Ennore Thermal Power Station building chima thi, Assam mi pakua chhungte chu chhamdawlna pek an ni dawn tih a puang. Thite hi hnathawka awm niin pali chu Karbi Anglong district ami an ni a, panga dang chu Hojai district ami an ni.

Tamil Nadu chief minister M K Stalin chuan chhiatna thleng chu pawi a tih thu sawiin, mitthi chhungte hnenah zángnadawmna Rs nuai 10 pek an ni dawn tih a puang. Mitthi ruangte hi Assam-a phurh haw thuai an nih theihna turin thupek a tichhuak bawk.

Prime minister Narendra Modi chuan chhiatna thlenga nunna chante leh an chhungte chu a ngaihtuah reng thu sawiin, hliam tuarte pawh an dam leh thuai a duhsak thu a sawi. Prime Minister chuan mitthi chhungte hnenah PMNRF (Prime Minister’s National Relief Fund) aṭangin zangnadawmna, Rs nuai 2 pek an ni dawn tih puangin, hliam tuarte chu Rs 50,000 ṭheuh pek an ni dawn tih a tarlang.

Chennai-a chhiatna thlengah Assam mi pakua thi an awm avangin state mipuite pawhin an ngaihve hle. Tamil Nadu official-te nen pawh inbiain, ruangte chu him taka Assam thlenpui a nih thuai theihna turin hma an la mek a ni.