Meghalaya: CM-in tourism helpline tlangzarh

Meghalaya chief minister Conrad K. Sangma chuan Thawhṭanni khan India rama tourism helpline hmasa ber a tlangzarh. Helpline hi ṭawng chi sariha hman theih tura duan niin, nitin zing dar 8 aṭanga zan dar 8 thleng hman theih a ni ang.

CM Sangma chuan Meghalaya chu khualzin hip leh khualzinte tana tlawh nuam a nih bakah, khualzinte himna kawngah pawh a hming a ṭha a, chhawmnun zel an tum tih a sawi. Helpline hi khualzinte himna atan a pawimawh bakah, thu rintlak tak pe chhuak tura ruahman a ni.

Helpline tlangzarh rual hian Meghalaya Tourism website tlangzarh nghal a ni a; itinerary, booking option, travel tip-te, leh tualchhung festival hrang hrang tarlan a ni. Sangma chuan state in sum a hmuhna kawngah tourism sector pawimawh dante sawiin, kum 2024-ah ramchhung aṭanga tlawhtu nuai 16 leh rampawn aṭanga tlawhtu nuai 2.3 vel an nei a, tourism industry-ah hna 50,000 vel a siam tih a tarlang.

Sangma chuan infrastructure chungchangah tourism project 210, Rs vbc 3,625 senna tur kalpui mek a nih thu sawiin, Umroi Airport tihzauh pawh kum 2027 kumtir lamah zawh hman beisei a ni, a ti. Thlawhtheihna lian zawk hmangin Shillong chu India khawpui tam zawk nen thlunzawm a ni dawn tih a sawi.