Tribal pawlin Assam-Meghalaya hydropower project dodal

Assam leh Meghalaya sorkarin Kulsi lui, Gangetic lui dolphin-te chenna hmuna MW 55 Ukiam hydropower project siam an tumna chu Garo National Council (GNC), Rabha National Council (RNC), leh tribal pawl dang eng emaw zatin duh loin lungawi lohna an lantir.

Ningani khan Ukiam picnic spot-ah lungawi lohna hi lantirin Assam - Meghalaya Joint Protection Committee hnuaia pawl hrang hrang an tel. He huna thusawitute chuan project hian ecology leh eizawnna a tichhe dawn tih an sawi. Project thawhna tur tuikhuah hi Kulsi fintu Dron, Shree leh Dilma lui inzawmna hmun a ni a, Assam-Meghalaya ramri, Guwahati khawchhak lam km 80 vela hlaa awm a ni.

GNC president Enindra Marak chuan he project hi engti kawng zawng pawhin dodal a ni dawn tih sawiin, kum 2026-a assembly inthlan neih zawh hnu thlengin tihkhawtlai theih a nih thu a sawi. State sorkar pahnihte hian khaw 15 vel chauh a nghawng dawn nia an sawi chu thu dik lo a nih thu sawiin, Meghalaya aṭanga Brahmaputra thlengin a nghawng dawn tih a sawi bawk.

RNC chief convenor, Gobinda Rabha chuan project hi kalpui a nih chuan ram bigha nuai 1.9 (hectare 25,418) vel hloh a ni dawn tih tarlangin, Assam sorkar chu leilung fate remtihna ni lo leh an thu ngaichang loa tribal huamchhunga project kalpui tumah a puh.

Assam chief minister Himanta Biswa Sarma leh Meghalaya chief minister Conrad K. Sangma-te chuan June 2 khan state pahnih ramri, km 885-a thuia buaina awmte chingfel tura meeting an neih hnuah, MW 55 hydropower leh irrigation project siam tumna hi an puang a ni. Ramria buaina a neihna hmun 12 zinga hmun parukah inremna chu March 2022 khan an lo ziakfel tawh a ni. Sorkar pahnihte chuan tualchhung mipui nen inrawnkhawmna an neih hnuah MW 55 Kulsi project chu kalpui a ni dawn tih sawiin, project hi state pahnih tana electric siam chhuahna tur a ni a, Assam-in irrigation-ah hamṭhatna a hmu dawn a ni, tiin Sarma chuan thla li liam ta khan thuthar lakhawmtute a hrilh a ni