Sikkim : CM-in disaster management official 1,185 ruat

Sikkim chief minister Prem Singh Tamang chuan September 18 khan khuarel chhiatna thlen palh thulhah mipui himna chu state sorkar chuan a ngai pawimawh hle tih sawiin, hei vang hian Disaster Management Official 1,185 ruat an nih thu a puang.

CM hian September 18, 2011-a Sikkim-a lirnghing magnitude 6.9-a na a thlen aṭanga kum 14 tlinna denchhena State Disaster Risk Reduction Day hmannaah a puang a ni. Kum 2011-a lirnghing vang hian mi tam tak an thih bakah, bungrua eng emaw zat a tichhia a, eizawnna leh nitin khawsak thlengin a buai phah nasa hle.

Tamang chuan khuarel chhiatna laka invenna leh inbuatsaihna chu a kaihhruai sorkar chuan a ngai pawimawh hle tih sawiin, "Tun hmaa khuarel chhiatna thleng tawh aṭanga zir chhuah kan neihte ngai pawimawh a, hemi kawnga kan inpek a pawimawh a ni,” a ti. State-in chhiatna tam tak, lirnghing, leimin, leh tuilian a tuar nasa tawh tih sawiin, heng chhiatna thleng ṭhin dawnsawn leh hma lak zuinaah mipui inpumkhatna leh chakna a lang ṭhin a ni, tiin a sawi. State mipui huaisenna leh inpumkhatna chu a fak bawk a, kumin thupui atan ' Empowering Communities, Safeguarding Sikkim' tih niin, a bulṭhut aṭanga inbuatsaihna kalpui a pawimawh tih a sawilang bawk.

Mipuite chu mock drill, training programme, leh inzirtirna lama beihpui thlaknaah a tam thei ang ber tel turin CM chuan a chah a, chhungkua bakah zirna ina inbuatsaihna kalpui a nih theihna tura theihtawp chhuah ṭheuh turin a fuih.