Meghalaya taxi association-in nawrh huaihawt titawp

Meghalaya-a All Khasi Meghalaya Tourist Taxi Association (AKMTTA) chuan state chhunga khualzin tlawh tamna hmuna state pawn lam khualzin phur lirthei tlan luh khap phuta tiam chin awm loa nawrh an huaihawt chu September 18 tlai khan an titawp.

AKMTTA chuan an thil phut chungchangah East Khasi Hills Deputy Commissioner-in Thawhlehni, September 23-a meeting neih a remtih avangin nawrh hi an titawp tih an sawi. Meeting-ah hian transport leh tourism deparment pawh an tel ang.

Meghalaya tourist taxi driver-te hian an ṭhenawm state-a khualzin phur lirtheite chuan an state chhung khawi hmunah pawh khualzinte an phurh kual ve theih vek avangin an sumdawnna an tih chhiatsak niin an sawi. Hei vang hian nawrh huaihawtin Assam aṭanga lut tur motor-te an dang a ni.

AKMTTA thupuangtu Balajied Jyrwa chuan campaign chu tharum thawhna tel loa kalpui a ni tih sawiin, tualchhung taxi driver-te harsatna tawh dan tarlanna thuziakte sem a nih thu a sawi. An pawlin Assam tourist taxi-te Meghalaya-a tlan luh an khap an phut nia sawi chu thudik lo a nih thu tarlangin, khualzin tlawh tlamna hmunah chauh tlan khap turin an phut tih a sawi.