Assam : 'Seva Saptah' hnuaiah blood donation camp buatsaih

Assam sorkar chuan Nilaini khan state pum huap thisen pek camp a buatsaih. Hei hi prime minister Narendra Modi kum 75 tlin lawmna puala September 17- 25 chhunga khawtlang tana thil ṭha tihna hun, 'Seva Saptah' kalpuina peng pakhat atana neih a ni.

State Health & Family Welfare Department leh Assam State Blood Transfusion Council ṭangkawpin an buatsaih blood donation camp 75-ah hian a mamawhte tana hman turin thisen unit 3,167 lakkhawm a ni.

Kar khat chhung awh tur 'Seva Saptah' ah hian mipui hamṭhatna tur leh, khawtlang chawikanna tura hmalakna neih chhunzawm zel a ni dawn a, state pumah district 35-ah October 2 thlengin health camp 14,690 siam hman tum a ni bawk.

Vawiin hian Legislative Assembly Constituency tinah naupang tan mega health camp buatsaih a ni dawn a, naktuk Inrinni hian khawpui leh thingtlanga zirna in 20,000 ah thing ṭiak nuai 30 chuang phun a ni bawk ang. September 21 hian ṭhalai, thu leh hla lama che ṭhate Rs. 25,000 pek an ni dawn a, September 22-ah tuberculosis (TB) veite tan Ni-kshay Mitra aṭangin ṭanpuina pek an ni dawn bawk.

September 23 hian sakhua inzirtirna hmun hrang hrangah ram patta sem a ni dawn a, Seva Saptah kharna hun hi September 25-ah neih a ni dawn a, Assam sorkar DBT scheme Orunodoi 3.0 tlangzarh a ni nghal a ni ang.