Manipur : Governor-in 'Nation First @75 Campaign leh 'GovConnect Manipur' portal hawng

Manipur governor Ajay Kumar Bhalla chuan September 17 khan Raj Bhavan-ah 'Nation First @75 Campaign' leh 'GovConnect Manipur' portal a hawng. Hawnna inkhawmah hian chief secretary Puneet Kumar Goel, NDDB chairman Meenesh Shah leh senior official-te an tel.

Campaign hi Viksit Bharat Viskit Manipur hnuaia kalpui niin thingtlang hmasawnna, hmeichhiate chawikan, thiamna tihpun, digital hmanga inrelbawlnate ngaih pawimawh an ni a, Swasth Nari Sashakt Pariwar Abhiyan (SNSPA) nena inzawm a ni bawk. September 17- October 2 thlenga kalpui tur a ni a; chenna leilung, kutkawih eizawnna (entrepreneurship), hriselna, Atmanirbhar Bharat, Fit India, PMJANMAN, Aspirational District, leh Make in India hnuaia tualchhung industry chawikanna, vocal for local atana hmalakna a ni.

GovConnect Manipur hi online hmanga mipuiten sorkar service chungchanga an lungawi lohna leh rawtna awmte an thlen theihna tura duan niin, portal-ah hian engtiklai pawhin mipuite chuan complaint an theh lut thei dawn a ni. Bhalla chuan digital technology hmang hian mipuite chuan sorkar inrelbawl dan langtlang zawkin an hre thei dawn a ni tiin, sorkar rintlak dinna kawngah pawh a pui thei ang, a ti. State mipuite chu he platform hmang ṭangkai tur hian a chah bawk.

Portal bakah hmalakna dang panga tlangzarh a ni bawk a, chung zingah chuan Manipur Milk Union tihchak, Delhi, Bangalore leh Hyderabad-a Migration Support Centre din, cabin crew dil tumte tan Residential Skill Development Program buatsaih leh Transport Department aṭanga digital service thar palite an ni.