Kaziranga National Park-a sakei chhiarpui hna ṭan

Karizanga National Park leh Tiger Reserve official-te chuan park-a sakei awm zat chhiar leh a awmte dinhmun enfiah hna thawh lina chu an ṭan. 

Park director P. Sivakumar leh divisional forest officer Ramesh Kumar Gogoi-te chuan chhiarpui thawh lina hi an hawng a ni. Sivakumar chuan Kaziranga Tiger Reserve chu block liah an ṭhen a, block hnih hi Assam wildlife division khawchhak lamah awmin, block thumna hi Biswanath wildlife division leh block lina chu Nagaon wildlife division hnuaiah awm a ni tih a sawi. Tiger reserve area pum hi square kilometer 1,055-a zau a ni. 

Reserve area huam chhung hmun hrang hrangah park chhunga sakei chevel thlithlaina turin monitoring camera 276 dah a ni a, camera pakhat hian square km hnih-a zau a cover thei dawn a ni. He hna thawhnaah hian forest department mi leh sa bakah tualchhung school leh college-a volunteer-te pawh chhawr tel an ni ang. Kum 2018-a sakei chhiarpui neihah khan Kaziranga National Park-ah hian sakei 120 vel an awm a ni.