KMSS hotu Akhil Gogoi bail dilna hnawlsak
Gauhati High Court chuan jail-a tang mek, Krishak Mukti Sangram Samiti (KMSS) hruaitu leh anti-Citizenship Amendment Act (CAA) activist Akhil Gogoi-a'n bail-a chhuah a dilna chu Ningani khan a hnawlsak.
Ningani khan division bench chuan KMSS hruaituin National Investigation Agency (NIA) in thubuai a siamsak chungchangah bail dilna a thehluh chu a ngaihtuah a CAA dodalna a lantir chungchangah Gogoi hi kum 2019, December thla khan man niin, NIA chuan hemi chungchangah hian Chandmari police station-ah thubuai a ziahlut a ni. Hei bakah hian Gogoi hi thubuai dang eng emaw zat siamsak a ni bawk a, heng zingah hian Unlawful Activities (Prevention) Act hnuaiah ram phatsantu nia puhna pawh a tel. Thubuai 13 siamsak niin, heng zinga thubuai 12-ah erawh chuan bail-a dilna hi phalsak a ni a, mahse NIA in thubuai a siamsak erawh bail-a chhuah phalsak a ni ta lo a ni.
Gogoi-a advocate chuan High Court-in bail dilna a hnawlsak avangin jail-a a la awm chhunzawm a ngai dawn tih sawiin, Supreme Court-ah appeal an tum tih a sawi. High Court thutlukna hian Gogoi thlawptute a tilungawi lo hle a, hmun hrang hrangah lungawi lohna an lantir nghal a ni. KMSS political party din thar, Raijor Dal hruaitute chuan Gogoi chungah state sorkar chet danah an lungawi loh thu an sawi. BJP kaihhruai sorkar chu democracy kalphung palzutah an puh a, bail-a chhuah phalsak ni lo mah se Gogoi hian assembly inthlan lo awm turah a chuh dawn tho niin ṭhenkhat chuan an sawi bawk.