Tripura medical college-in world record siam

Tripura Santiniketan Medical College (TSMC) chuan academic session hmasa berah state hrang hrang aṭanga zirlai inziak lut tam lamah world record a siam a, World Book of Records, London-ah an hming a chuang.

College hian academic session hmasa ber, 2024-25 ah MBBS zirlai 150 neiin, zirlaite hi state 21 aṭanga kal an ni. Pathianni khan Britain Parliament-a House of Commons-ah world record an siam hriatpuina hi official-a hlan an ni.

TSMC president Malay Pit chuan hetiang thil chhinchhiah tlak tak mai an tawng chu lawmawm a tih thu sawiin; zirlaite, faculty leh staff-te a fak. "He chawimawina hi state leh mipuite tan kan hlan a, an thlawpna leh rinna chuan min tichak chhunzawm zel a ni," a ti.

Agartala khawpui pawn, Madhuban-a awm, TSMC hi kum hnih liam taa din kha niin, zirna in bakah mi tam tak beiseina tihhlawhtlinna hmun a ni tih Pit chuan a sawi. College hi zirlai zir phu, a bikin hnam hnuaihnung zawkte pawhin medical lam zirna ṭha an neih theih dan tur ngaihtuaha din a ni tih a sawi a, an hlawhtlinna chuan tualchhung mipuite tumruhna leh, state-in damdawi lam zirna huang zauh tura a hmalakna lian tham tak a tilang chiang hle a ni, tiin a sawi.