Arunachal Pradesh : Sorkar laipui leh state sorkarin MoU ziak

Arunachal Pradesh leh sorkar laipui chuan Upper Siang Multipurpose Project (SUMP) hmanga eizawnna, infrastructure, leh tualchhung industry tihhmasawnna turin Thawhṭanni khan thawh dunna tur inremna, memorandum of understanding (MoU) an ziak.

MoU ziahnaah hian chief secretary Manish Kumar Gupta; State Coordination, Planning and Investment commissioner Ankur Garg, union Jal Shakti ministry secretary V L Kantha Rao, union power secretary Pankaj Agarwal leh S K Sinha, commissioner (B&B) te an tel.

Hmalakna hi mega hydroelectric leh water storage project atana pre-investment atana tih niin, Siang leh Upper Siang district-a socio-economic landscape tihchangtlunna tur a ni. Hma an lakna tur pawimawh zingah eizawnna, infrastructure thar, leh a awm tawh sa tihchangtlun a ni dawn a ni. Sector ngaih pawimawh zingah ran vulh, vawk vulh, sangha khawi, horticulture, puan tah (handloom), mau, eco-tourism, leh khuai khawi te an tel bawk ang.

Official-te chuan tualchhung thil siam chhuah puan (textile) leh mau hmanga an thil siamte hralh chhuahna tur ruahmanna pawimawh tak siam a ni tih thu sawiin, hei hian kut hnathawktute chu ram chhung leh ram pawn lama zau zawka sumdawnna an kalpui theihna turin a pui dawn a ni. He hmalakna hmang hian district hrang hrangah infrastructure, common facility centre, craft-based resource hub, marketing and sourcing centre, urban haat, emporia, leh raw material depot-te din a ni dawn a ni.