Assam : NIT-a Bangladesh mi zirlai thawn haw dawn

Assam-a National Institute of Technology,Silchar-a Indian Council for Cultural Relations (ICCR) scholarship hnuaia Bangladesh mi zirlai panga awmte chu campus chhunga buaina leh tharum thawhnaa an inhnamhnawih avangin an rama thawn haw tura tih an ni tih official-te chuan Thawhṭanni khan an sawi.

NIT director Dilip Kumar Baidya chuan Bangladesh zirlaite hi hostel-a an room aṭangin ruihhlo leh a kaihhnawih an man sak bawk tih a tarlang.

September 8 khan campus-ah third year zirlai pangate hian tharum thawhna thlenin rod, chemte leh screwdriver hmangin Bangladesh mi an zirlai pui final year zirlaite chu beiin an mi beihte hian hliam na tak an tuar a ni.

Zirlai hliam tuarte chu Silchar Medical College and Hospital (SMCH) ah kalpui an ni a, pahnihin an lu ah hliam na tak tuarin intensive care unit (ICU)-ah dah an ni.

He thil thleng vang hian NIT Silchar thuneitute chuan buaina siamtu zirlaite hi thawn haw turin an ti ta a ni. Zirlaite hi semester hnih chawlh tir an ni dawn a, class lak phalsak an nih loh bakah, campus chhunga awm an phal loh avangin an ram lamah thawn haw tura tih an ni. Hostel aṭangin chhuah tir an ni tawh bawk.