Arunachal Pradesh : TRIHMS thuneituten complaint theh lut

Arunachal Pradesh-a Tomo Riba Institute of Health and Medical Sciences (TRIHMS) thuneitute chuan doctor pahnih, an duty laia thir tiang hmanga beih an nih avangin police hnenah complaint an theh lut.

TRIHMS chief medical superintendent Dukhum Raina chuan nimin khan Naharlagun police station-ah complaint theh lutin, doctor pahnih beitu tunge tih la hriat loh lakah rang taka hma la turin a ngen. Dr Arvind Pusha leh Dr Tom Tariang-te chu zing dar 10:50 vela ENT Ward-a an duty lai chu mi tu tih hriat lohin thir tiang hmangin a bei tih a tarlang.

Complaint-ah hian pawikhawihtu chuan Pediatric Department-a senior resident Dr Arvind Pusha chu a hnunglam aṭangin thir tiang hmangin vawi 15 vel vuain, kut a thlak zui bawk tih a sawi. Hemi hnuah Dr Tom Tariang pum leh a lu chu thir tiang hmang bawkin a bei leh a, hliam na tak an tuar a ni, a ti. He thil thleng hi nurse duty-te chuan hmuin, lo dan pawh an tum niin a sawi bawk.

Dr Raina chuan hospital-a thil thleng chu dan leh thupek bawhchhiatna nasa tak a ni tiin, healthcare hna thawktute tan pawh hlauhthawnna a thlen tih a tarlang. Hospital thuneitute chuan damdawi- in chhunga tharum thawhna thleng chu pawm zam theih loh tiin an sawi.