Meghalaya : Sorkarin JE hri do hna chak takin kalpui

Meghalaya sorkar chuan Nilaini khan Assembly-ah Japanese Encephalitis (JE) hri dona kawngah hma nasa takin a la tih hriattirin, Smart City Mission hnuaia project hrang hrangah pawh hmasawnna lian tham tak a awm tih a sawi.

Health and family welfare minister Ampareen Lyngdoh chuan, state-ah JE natna vei hmuh chhuah chu kum hnih liam ta chhungin mi 236 an awm tih tarlangin, kum 2023-24-ah mi 89 in an vei a, kum 2024-25 chhungin mi 147 in an vei a ni. Naupang thla 9-11 leh thla 16-23 inkar tan universal immunization program hnuaiah he natna venna atan hian JE vaccine pek an ni tih a sawi bawk.

Lyngdoh chuan JE vaccine pek pawimawhnate sawilangin, sorkarin ngaihdan dik lo awmte tihbo tumin hma a la mek a ni, a ti. Garo Hills-a district hrang hrang- East, North, South, South West, leh West Garo Hills-ah 80% - 95% inkarin vaccine an la tawh tih a sawi. East Khasi hills-ah 71% in vaccine la tawhin, Ri-Bhoi-ah 82% pek an ni tawh bawk a ni.

Assembly rorel inkhawmah deputy chief minister Sniawbhalang Dhar chuan Smart City Mission hnuaiah July thla thlenga hmasawnna hnathawh chu 77.81% a nih thu a tarlang bawk. Project thawh khatnaah commercial complex-te ngaih pawimawh ber a nih thu leh, a thawh hnihnaah project pawimawh dang kalpui a ni dawn, tiin a sawi.

VPP MLA Ardent Basaiawmoit-a zawhna chhangin, Dhar chuan Shillong hmun hrang hrangah open-air gym siam mek a ni a, chung zingah chuan Governor House, Mawprem, leh Laitumkhrah-te pawh telin, project senso atan Rs vbc 5 dah a nih thu a tarlang. Tun hnaia union finance minister Nirmala Sitharaman-i'n a hawn, Polo commercial complex-a dawr 109 chu hman theih tura hmalak mek a ni, a ti.