Nagaland : Tripatite meeting vawi lina nei

Ministry of Home Affairs (MHA), Nagaland sorkar leh Eastern Nagaland People's Organisation (ENPO) aiawhte chu September 9, 2025 khan a vawi lina atan Police Complex, Chumoukedima-ah an inbia.

ENPO media cell chuan meeting hi darkar thum chhung neih a nih thu sawiin, an pawl thil phut hrang hrangte sawi ho a ni thu a tarlang. MHA team chuan an pawl thil phut zinga mi, Frontier Nagaland Territory (FNT) din chungchangah draft siamin, a rang thei anga high level committee meeting koh an tiam tih an tarlang.

MHA team hi advisor (NE) AK Mishra-a'n a ho a, joint director IB Rakesh Kamble leh SIB Nagaland deputy director Vineet Kumar te an tel. State sorkar aiawhte hi chief secretary Senti Yanger Imchen-a'n hoin, ENPO aiawhte hi an pawl president Chingmak Chang-a'n a ho a ni.

MHA advisor Mishra hian September 8 leh 9 khan NSCN (IM) hotute a kawm bawk a, Framework Agreement chungchang a sawipui. Nagaland-a civil society organistation hrang hrang hruaitute kawm a tum bawk.