Meghalaya : Sorkarin tui supply scheme atan Rs vbc 700 a ruahman

Meghalaya chief minister Conrad K Sangma chuan Thawhlehni khan state sorkarin tui supply scheme thar atan Rs vbc 7000 a ruahman tih a puang. He scheme hian Shillong leh a chhehvela tui supply-a harsatna nasa tak awm ṭhin a tiziaawm dawn tih a sawi.

CM Sangma chuan assembly-a thu a sawiah, project chu kalpui thuai a ni dawn tih tarlangin, hun rei tak chhung tui supply ṭhat loh avanga harsatna tawk tawh mipuite harsatna a chhawk dawn a ni, a ti. Hei bakah nitin tui litre mtd 33 pe chhuak thei, Wahrynthem water project leh Dawki-a Umngot lui tui lakchhuahna tur pawh kalpui a ni dawn tih a sawi.

Eptu pawl hruaitu Mukul Sangma chuan sik leh sa inthlak danglamin nghawng a neih dante thlirin hetiang project kalpui tur chu ngaihtuah zui a ngai hle tih a sawi. Hei hi chhangin Chief Minister chuan sorkarin harsatnate awmte chu pawn lam aṭanga ṭanpuina project hmangin a hmachhawn mek thu a tarlang.

Sangma chuan kum 2019-a state-in tui policy hmasa ber a pawm hnuaia, Meghalaya Climate Council hnathawh leh pawimawhnate a sawilang bawk. Kuminah ruahtui 50% in a tla tlem tih a sawi a, sorkarin mipui mamawh ang zat tui supply a awm theihna turin nasa takin hma a la mek a ni, a ti.

Public health engineering minister, Marcuise N Marak chuan hun rei tak chhung tihkhawtlai tawh, Greater Shillong Water Supply Scheme (GSWSS Phase-III) chu nakkum March thlaah zawhfel a nih tur thu a sawi bawk.