Sikkim : Khualzin tan North Sikkim hawng leh ta

Sikkim sorkar chuan leilung chhiatna thleng vanga North Sikkim a khar hnuah, Thawhṭanni atang khan khualzin tlawh theih turin a hawng leh ṭan ta. Thla li dawn tlawh theih loha khar a ni hman a ni.

Tourism leh civil aviation department additional chief secretary, CS Rao chuan Lachung, Yumthang Valley leh Zero Point te chu hawn a ni leh ta tih a sawi a, Lachen erawh hawn a la ni lo thung. Thawhṭanni aṭang khan khualzinte hnenah online permit pek chhuah ṭan a ni tih a sawi.

Rao chuan Sanklang lei chhia pawh Border Roads Organisation (BRO) in an siamṭha tih sawiin, hei bakah Chungthang kal turte tan kawng dang pawh siam a ni bawk a ni, a ti.

Sikkim hi khualzinin an tlawh nasat avangin tourism sector aṭangin sum pawh an la lut ṭha ṭhin hle. Kum 2024 khan khualzin tlawhtu hi ram chhung aṭangin mi 256,537 bakah ram dang aṭangin 30,864 an awm a ni. Kuminah pawh tlawhtu ṭhahnem tak an awm tawh bawk.