Assam : BJP leh AGP MLA hlui 3 in Congress zawm

Assam-a BJP MLA hlui pahnih leh BJP thawhpui, Asom Gana Parishad (AGP) MLA hlui pakhat chuan Thawhṭanni khan Congress party an zawm. Congress general secretary (organisation ) KC Venugopal-a'n an party-ah a lawm lut.

Congress party zawmtu MLA hluite hi - BJP aṭangin Binanda Saikia leh Dr. Mansingh Rongpi bakah AGP aṭangin Satyabrata Kalite te an ni. Saikia leh Rongpi te hi BJP-a an awm hma hian Congress-ah an lo awm tawh bawk.

Congress party chuan MLA hlui pathumin an party an zawm chu nakkuma assembly an neih tur atana an party hmasawnna tilangtu a ni tih an sawi. Venugopal chuan, "Assam mipuite chuan Himanta Biswa Sarma Pvt. Ltd rorelna hi an ning tawhin thlak an duh tawh a ni. He company hnuaiah hian eirukna a hluarin mipui chanpual ruksakna a nasa a, hei bakah BJP inṭhendarhna a kalpuina chu a la awm bawk," a ti. Mipuite ngaihsaktu sorkar a din leh theihna turin mipuite chuan assembly inthlan lo awm turah chuan Congress an thlawp dawn a ni, tiin a sawi.