Meghalaya : Police-ten lirthei rukbo kaihhnawihah mi 17 man

Meghalaya police-te chuan ramri kaltlanga lirthei rukbo kaihhnawihah mi 17 an man a, an zingah hian Bangladesh mi 10 an tel. Police chuan an mi mante hian Shillong hmun hrang hrang aṭangin lirthei ke pahnih nei ru chhuakin, ramriah an hralh ṭhin niin an sawi.

East Khasi Hills district-a Mawmang-a lirthei an endiknaah, September 4 khan Shillong lam pana scooter tlan chu tihdin a ni a, a hnunga chuang Nehlang Lamare (24), West Jaintia Hills, Barato-a cheng chu a tlanchhe hman a, a khalhtu erawh man niin, Klement Timung (18) Jowai- a cheng a ni tih hriat chhuah a ni bawk. An pahnih hian an scooter khalh chu Shillong-a Lapalang huamchhung aṭanga an ruk a ni tih an sawi.

Hemi ni vek hian district police Special Cell chuan midang pathum man belh lehin, an vai hian West Jaintia Hills, Dawki-a cheng an ni. A hnuah pawh mi dang man lehin an zingah hian rawlthar kum 15 mi a tel.

Beihpui an thlakna kalzelah, police-te chuan Bangladesh mi 10 an man belh bawk a, an zingah hian kum 17 mi pawh telin, Bangladesh-a Sylhet leh Habiganj district-a cheng an ni tih an hrechhuak bawk.