Tripura : Women university din turin ruahmanna siam

Tripura chief minister Manik Saha chuan state sorkarin hmeichhiate tihchakna atan leh zirna sang zawk chawikanna atan Women University din tura hma lak mek a ni tih a puang. He thu hi Zirtawpnia Rabindra Satabarshiki Bhavan-a Teachers' Day vawi 64-na an lawmnaah a puang a ni.

Chief Minister chuan zirtirtute chu fakin, zirlaite tan mi pawimawh tak an ni tih sawiin, ram leh hnam ṭhanlenna atan mawhphurna lian tak an neih thu a tarlang. Zirtirtute chuan zirtirna an pek kawngah rilru, taksa leh ngaihtuahna hrisel an zirlaite an hrilh hriat a ṭul tih sawiin, sorkar chuan langtlang takin National Education Policy (NEP) zulzuiin zirtirtu thiam leh tlingte chauh a la dawn a ni, a ti.

CM chuan zirna lama hmalakna thar pawh sawilangin, sorkar college thar pathum din a nih dawn bakah, zirlai hmeichhia chu Mukhyamantri Kanya Atmanirbhar Yojana hnuaiah scooter pek an ni dawn tih a sawi bawk. College zirlai hmeichhiate tan college fee tihtawp sak an nih tur thu te, MBBS seat tihpun leh Dental leh Nursing college din tura ruahmanna siam a nih thu a sawi bawk.

State leh sorkar laipui hnuaia hnathawkte Dearness Allowance (DA) leh Dearness Relief (DR) inthlauhna awm tiziaawm turin sorkarin hma a la mek tih Saha chuan a sawi. Tunhmain mipuite chuan DA leh DR chungchangah lungawi lohna an lantir ṭhin tih sawiin, tun dinhmuanh 32% in tih pun a nih tawh thu leh, sorkar laipui nena inthlauhna awmte tiziaawm turin hma lak chhunzawm zel a ni, a ti.