Meghalaya : CM-in review meeting kaihruai

Meghalaya chief minister Conrad K. Sangma chuan August 28 khan Tura-ah review meeting kaihruaiin, senior official-te nen project pawimawh thawh mek zingah medical college, sports infrastructure leh Jal Jeevan Mission (JJM) hmasawn dante an sawi ho.

CM Sangma chuan Tura Medical College chu peih fel thuai a ni dawn tih sawiin, Shillong Medical College-ah September 2026 hmaa class neih ṭan a nih theihna turin sorkarin nasa takin hma a lak thu a sawi. Shillong, Tura leh University of Science and Technology Meghalaya (USTM) college-te chu hman ṭan tawh niin, kumtin doctor 550 an chhuah theih beisei a ni.

Infiamna chungchangah Chief Minister chuan thingtlang leh block level-ah a bulṭhut aṭanga hma lak a ni dawn tih sawiin, infiammite tihhmasawnna atan tournament buatsaih ṭhin a nih tur thu a sawi.

Jal Jeevan Mission (JJM) hmasawnna pawh thlirlet a ni a, CM chuan report-a a lan danin 90% zawh fel tawh a nih thu sawiin, chhungkua 20% velin tui supply an la nei lo tih a tarlang a, Functional Household Tap Connection (FHTC) chu state pum huapin audit neihpui tura hriattirin, chhungkua hmaih bik an awm tur a ni lo, a ti.

Thlirletna an neihte hi hmasawnna an neihte chauh ni lo, harsatna awmte hriatchhuah a chinfel dan tur ngaihtuah hona leh project-te chu a hun taka zawh fel a nih theihna tura hmalakna a nih thu CM Sangma chuan a sawi. Harsatna an tawhte sutkian a, thutlukna an siam apiangah mipuite chu dah pawimawh ber an ni, a ti bawk.