Assam : Sakhaw in ang lote ram inlei tir dan tur SOP pawm

Assam cabinet chuan sakhaw in ang lote inkara ram hralh leh inlei tir dan chungchanga kaihhruaina, standard operating procedure (SOP) a pawm.

Chief minister Himanta Biswa Sarma chuan sakhaw hrang hrang inkara immovable property hralh tur chungchanga phalna pek dan tur atan SOP hi pawm a nih thu thuthar lakhawmtute a hrilh. Thutlukna an siam hi ram pawn lam mi state chhunga inbengbel tur laka invenna kawnga sorkar hmalakna pawimawh tak a ni tih a sawi bawk.

Assam-ah ram hralh tur chu uluk taka kalpui a ngai a, ram hralh tur chu sorkar hnenah thlen tur a ni a, sorkarin a lo endik zel dawn a ni, tiin CM Sarma chuan a sawi. Ram leitu sum hmuhna an endik hmasa dawn a, ram hralh tur chuan vantlang thil a nghawng dawn em tih te, ram leh hnam himna lam a nghawng thei dawn em tihte endik vek a ni ang, a ti.

Department Nodal Officer chuan Assam Police Special Branch-ah a thawn dawn a, Assam Police Special Branch chuan inbumna, innawr luihna leh dan bawhchhiatna lam thil a awm leh awm loh an enfiah dawn a, khawtlang inpumkhatnaah nghawng a neih theih dan an zirchian hnuah sorkarah report theh lutin, ram hralh tur chungchangah District Commissioner-in thutlukna a siam dawn tih CM chuan a sawi.