Nagaland Governor atan Ajay Kumar Bhalla la lut

Manipur governor Ajay Kumar Bhalla chu Thawhṭanni khan Nagaland Governor 22-na atan Raj Bhavan-ah rinawmna thu tiam tira lakluh a ni.

Governor Bhalla hi Nagaland governor La Ganesan a thih tak avangin he hna hi hmui tura tih a ni. Bhalla hi Gauhati High Court chief justice, Justice Ashutosh Kumar-a'n thutiam a lak tir a ni. Lak luh inkhawmah hian Nagaland chief minister Neiphiu Rio, deputy chief minister T.R. Zeliang leh Y.Y. Patton leh state minister eng emaw zat bakah MLA, senior bureaucrat-te leh mi pawimawh tak tak an tel.

Thuthiam lak zawhah Governor Bhalla chuan CM Rio kaihhruai state cabinet nen Raj Bhavan-ah inbiakna an nei nghal.

Govenor thar lak luh inkhawmah tribal pawl hrang hrang, kohhran hruaitu leh civil society organisation aiawhte an tel. Hetih lai hian Ao, Angami, Lotha, Rengma, leh Sumi hnam intelkhawmin an din, Review of Reservation Policy (CoRRP) committee member-te erawh an tel duh lo thung a, job reservation policy an hman mek ennawn tura sorkar an nawrna kal zelah an thil ngente tihhlawhtlin a nih hma chu sorkar function-ah tel an tum lo tih an sawi a ni. Sorkar chuan an thil phut buaipui tur hian Reservation Review Commission a din a, mahse hei hi committee hian a pawm lo thung. Commission-ah hian tribal pawl leh civil society organisation aiawhte dah tel an phut a ni.