Sikkim : CM-in State Library sak mek endik

Sikkim chief minister Prem Singh Tamang chuan Thawhṭanni khan Sikkim State Library, Gangtok-a MLA Hostel bulhnaia sak mek chu endikin, official-te chu a hun taka zo fel turin a hriattir.

State library sakna atan hian project lian tham tak siam niin, tunlai bungraw changkang zawk hmanga thuam a ni dawn. Art Gallery, Digital Library, Physical Library, Aatmanirbhar Research Centre, leh Institute of Transforming Sikkim-te pawh a awm dawn a ni.

Building and Housing Department official-te chuan Chief Minister chu an hnathawh hmasawn dan leh a hun taka zo fel tura an ruahmannate an hrilh. CM Tamang chuan library complex chu sak zawh a nih hunah chuan hriatna tihzauna, zirna atana pawimawh leh Sikkim hnam ziarang chawinunna atan a pawimawh hle dawn tih a sawi. Zirlai, researcher leh vantlang mipui tan thiamna lamah kawng zau tak a hawng dawn tih a sawi bawk.

State Library project chuan thiamna leh hriat zauna bakah hmasawnna a thlen dawn tih sawiin, ṭhangthar lo awm zel tur tan mahni inrintawkna kawngah a puih tur thu Chief Minister chuan a sawi. Official-te chuan project chu vantlang infrastructure, khua leh tui hamṭhatna tura sorkar hmalakna a ni tih tarlangin, zirna mai bakah hnam ziarang humhalhna tur a nih thu an sawi.