Assam : Sorkarin pawikhawihtu hremna pek dan tur tichhuak

Assam sorkar chuan Bharatiya Nyaya Sanhita (BNS) leh Bharatiya Nagarik Suraksha Sanhita (BNSS) hnuaia pawikhawihna ṭhenkhata thiam loh chantirte hremna atan khawtlang rawngbawlna hna pek dan tur kaihhruaina a ti chhuak.

Political (A) Department-in thuchhuah a siamah, court-in thiam loh a chantirte chu department leh zirna in hrang hrangah hna thawk turin hremna a pe thei dawn a, chung zingah chuan medical college, civil hospital, PHC, CHC, district administration office, revenue circle office, legal aid clinic, sorkar library, DLSA office, educational institution, municipal corporation, police station, public park, tar enkawlna, mental health institute, hostel, social welfare office, forest department, sahuan, leh museum-te an tel.

Khawtlang rawngbawlna (community service) tih hian hmun tihfai leh enkawl, casualty leh outpatient enkawl lama ṭanpui, trolley leh veivahnaa ṭanpuina pek, lehkhabu rem fel, office hnathawh, binding, kawng sir hnim sam fai, traffic leh mipui punkhawmnaa venhim hna thawh, thing phun leh tui pek te a huam dawn a ni.

Community service neih hun chhung chu court-in a duan angin, ni khat aṭanga ni 31 emaw, darkar 40 aṭanga darkar 240 emaw inkar a ni thei. Endikna hi district social welfare officer emaw, state sorkarin a ruat officer dang emawin an thawk ang.