Manipur: NPP-in special electoral roll revision neih ngen

Manipur-a National People’s Party (NPP) chuan kum 2027 legislative assembly inthlan neih hmain Manipur-ah electoral roll Special Intensive Revision (SIR) kalpui turin sorkar laipui an ngen. Dan loa state-a pem lut an pung zel leh, heng mite hi hnam leh hnam inkara buaina ti punlun zawnga chetnaa an inhnamhnawih ṭhin chungchang chu ngaihven ngai tak a nih thu an sawi.

Naoremthong, Imphal West-a party state office-ah Pathianni khan thuthar lakhawmtute kawmin, NPP national vice president leh deputy chief minister hlui Yumnam Joykumar Singh chuan assembly inthlan hnuhnung berah khan thil dik lo a thlen nasat thu a sawi a, dan loa pem lut tam takin vote an thlak chu ngaihtuah tham a ni, a ti.

Joykumar chuan meeting-ah hian sorkar laipui leh Election Commission of India chu chipchiar zawka electoral roll endikna nei turin ngen an rel tih a sawi a, remna leh muanna a awm theihna tura hmalaknate sawiin khawtlang hruaitute leh pawl hrang hrang inbiakna neih a pawimawh thu a tarlang. Tun hnai khan Kuki-Zo aiawh Thadou Inpi Manipur leh Meitei pawlin inbiakna ṭha tak an nei thei chu lawmawm a tih thu a sawi bawk.

Manipur Legislative Assembly-a member 60 awmnaah NPP hian MLA pasarih a nei mek a, November 2024 khan state-a BJP kaihhruai sorkar a thlawpna aṭangin a inhnukdawk. Mahse, national level-ah chuan National Democratic Alliance (NDA)-ah a la tel chhunzawm thung.